يوميات باحث عن عروسة

يوميات باحث عن عروسة .. متجددة باستمرار

"يا سلام ... الراحة طعمها حلو"

قفزت هذه الجملة إلى خاطري وأنا ممدد على الكنبة يوم الجمعة في تكاسل لذيذ
... أغمضت عيني في استمتاع وتتابعت الأفكار كشلال وجد طريقه بين صخور جبل
أبو علبة :
" هي دي العيشة ولا بلاش ... الواحد خلص دراسة, وخد تأجيل من الجيش , وفي
وظيفة محترمة .... مش ناقص حاجة تاني إلا إني أبقى وزير .... لا لا لا ...
الوزير شغلانة متعبة .... وكيل وزارة أحسن ... ساعتها هبقى إنسان متسلط
ورخم كده أذل الناس و ... "

قطع حبل أفكاري إحساسي بقبلة على رأسي .... فتحت عيني في بطء كمن يرفع 50
كيلو حديد لأول مرة في حياته ... لقيتها الحاجة بتبتسم ابتسامتها الساحرة
... رددت الابتسامة في محبة ورجعت تاني لتلك الأفكار السادية وأنا بفكر في
أحسن طريقة أعذب بيها المواطنين و أودي .............. ثواني ... في حاجة
مش طبيعية ...

فتحت عيني نص فتحة وبصيت من طرفها لأجد الحاجة جالسة على الكرسي بجانبي باتسامتها التي لم تفارقها ناظرة إلي ...

أخذت نفسا عميقا ثم زفرت في تكاسل مغمضاً عيني وقد أدركت ما ترمي إليه ...

أنا : خير يا حاجة ... شكلك عايزة تقولي حاجة ...

الوالدة: لا يا حبيبي أبدا ... أنا بس بطمن عليك ...

- يا أمي .... يا أمي ... ده أنا عارفك وفاهمك ... قولي بس عاوزة إيه ؟؟؟

- أبدا يا تامر ... ولا حاجة ....

- طيب أنا هنام بقى ...

- اتفضل يا حبيبي ...

- .................

- بقولك إيه يا تيتو ... هوه انت مش ناوي ؟؟؟

باغتني السؤال مسببا لي مغصاً معوياً... خصوصاً مع هذا الـ "تيتو" اللي متطمنش ... فتحت عيني وبصيت ليها ورددت في قلق :

ناوي على إيه يا حاجة ؟؟؟

الوالدة : مش ناوي تعمل زي محمود ابن خالتك ؟؟؟

فكرت في سرعة ... محمود جاب شقة .... رجله اتكسرت ... اتخانق مع أبوه ... قفشوه بيضرب بانجو ...

أنا : ممكن ... البانجو مش وحش برضه ...

-نعم ؟؟؟

-لا ... مش قصدي ... انت عايزاني أعمل زيه ازاي يعني ؟؟

-يعني ... زي معمل الجمعة اللي فاتت ...

-إيه ... صلى الجمعة يعني ؟؟؟

-يوووووووه على دماغك القفل دي ... قصدي تتأهل ... تكبر كده و .... و ... وتتجوز

اتنفضت من على الكنبة في غضب :

-أيوه بقى قولي كده ... احنا رجعنا للموال ده تاني ... وبعدين هوه الواحد لازم يتجوز عشان يبقى كبير عندكو يعني ؟؟؟

-ما هو يا تامر أنا لازم أفرح بيك ...

عدت إلى وضع الاسترخاء على الأريكة محاولا تأجيل الموضوع بأي شكل :

-طيب طيب ... لما أخلص دراسة ...

-يابني مانتا خدت الليسانس !!!

-آه ... قصدي لما أشوف موضوع الجيش ...

-انت يا تيتو مش خدت تأجيل ؟؟؟

-صحيح ... خلاص لما أجيب شقة يبقى ربنا يحلها ...

-أومال الشقة اللي أبوك اتشحطط وجابهالك من إسكان الشباب بالعافي دي بتاعة مين ...

اتعدلت في القعدة وأنا بهمهم :
-يادي الهم والقرف ... هوه الواحد لحق يتمتع بحياته ...

-أفندم ؟؟؟

-ولا حاجة يا أمي ... بصراحة ... أنا مبفكرش في الجواز دلوقتي ...

-ليه يابني بس ... ده الجواز ستر وغطا ...

-ستر وغطا ... ستر وملاية ... أنا مش عايز يا ستي ...

اقتربت وجلست بجانبي على الكنبة ووضعت يدها على كتفي وعلى وجهها تلك الابتسامة الساحرة :

-ولا حتى عشان خاطر ماما حبيبتو ؟؟؟

-يا حاجة متضغطيش عليا ... أنا مش عاوز أتنيل على عيني دلوقتي ...

رفعت يديها من على كتفي وابتسامتها تتلاشى ... واديتني جنب ....

في سري " آآآآآه .... هنبتدي "

اغرورقت عيناها بالدموع ثم انفجرت باكية :

-يا تامر ما هو العمر بيجري ... وأنا نفسي أفرح بيك قبل ما أموت ... هوه ده كتير عليا ؟؟؟

يا قلبي اللي عامل زي الخساية المستوية ... مقدرتش أستحمل ... خدتها في حضني وطبطبت عليها :

-يا حاجة إيه لازمته الكلام ده بس ... ربنا يخليكي لينا ... أومال مين اللي هيعملي صينية البطاطس ؟؟؟

ابتعدت عني قليلا ونظر ت إلي وقد توقفت عن البكاء :

-يا سلام .... يعني هوه ده كل اللي همك ... صينية البطاطس ...

-أكيد لأ يا حاجة ... أنا بهرج ...

-آآآآه ...

-انتي برضه بتعملي محشي تحفة ...

-تصدق إنك أرخم عيل في ولادي ...

-تصدقي إنك أحلى أم في الدنيا ...

ابتسمت ابتسامتها الملائكية وقالت :

-يعني خلاص .... هتتجوز

-ما دام ده يرضيكي يا حاجة يبقى أجوز البلد كلها لو تحبي

-لا ياخويا ... بطلوا بقى العين الفارغة بتاعتكو ... هنجوزك واحدة بس ...

رددت مبتسما باستسلام :

-اللي تؤمر بيه يا جميل ....

-طيب العروسة جاهزة عندي ...

بدأت أقلق ... وقلبي يعمل طاخ بوم ... طاخ بوم :

-عندك عروسة ... ودي تطلع مين إن شاء الله ؟؟؟

-سحر ... سحر بنت خالتك ...

-سحر ؟؟ .... البت سحر ؟؟؟ ... العيلة دي .؟؟؟

-عيلة إيه يابني ... انت عارف عندها كام سنة دلوقتي ؟؟؟ ... 20 سنة

-إيه ده ؟؟ .... هيا بتاكل السنين ولا بتاخد هرمونات ؟؟؟

-متبطل استظراف ... منتا من ساعة ما اشتغلت وانتا ولا بتبص على حد من قرايبك ...

-معلش يا أمي منتي عارفة ظروف الشغل ...

-ماشي ياخويا ... ظروف الشغل ولا ظروف الصياعة ... المهم .. أنا خدتلك ميعاد ... هنروحلهم الخميس الجاي

التفت فجأة في دهشة :

-ميعاد ؟؟ .... وانتي إيه اللي عرفك إذا كنت هوافق ولا لأ ؟؟؟

ردت وعلى وجهها ابتسامة ماكرة :

-عيب عليك ... ده أنا أمك يا ولد ... وكمان أنا عارفة إزاي أجيب آخرك ...

قامت لتخرج وأنا أردد :

-دانتي يا حاجة طلعتي !!! ... آخر مرة بجد أقع في الاشتغالة دي تاني ...

ضحكت بصوت عالي وقالت :

-مانتا كل مرة بتقول كده يا واد يا خيبة ...

-ربنا يهدينا ويهديكي يا حاجة ...

-الخميس الجاي إن شاء الله .... فاهم ؟؟؟

-حاضر ... ربنا يستر ... !!!!!

- - - - - - - - - - - - - - - - - - - - - - - - - - - - - - - - - - - - - - - -

"استنى يابني أعدلك أم الكرافتة ... انت فاكر نفسك رايح تجيب كشري من عند أم تفيدة ؟؟؟"

بصيت لأسامة أخويا الصغير وهو بيعدل الكرافتة :

- خلص يا عم الظريف ... بدل مجيبلك بقك ده في قفاك ...

"يلا يا تيتو ... هنتأخر يا حبيبي"

- حاضر يا أمي .... قال يعني انتو خلصتو ...

خرجت الصالة حانقا وأنا بمشي في قرف لأفاجأ بمحمد بيبصلي وعلى وجهه ابتسامة ماكرة :

- إيه الحلاوة دي .... مامتك عارفة إنك خارج لوحدك ...

مزاجي لا يسمح بالتهريج ... نظرت إليه بقرف :

- أيوه ... وبتقولك متنساش تبقى تاخد الرضعة بتاعتك من الدولاب ...

" متيلا يا تاااااااااااامر "

- يحرق تامر بهدومه بمصنع النسيج كله .... حاضر يا أمي جاي ...

نزلنا وركبنا التاكسي وتوجهنا إلى بيت خالتي .... يااااااااااه ... الواحد فعلا بقاله كتير ... كتييييييير أوي مجاش هنا ...

طلعنا فوق حيث استقبلتنا خالتي بالأحضان وملصت وداني مخرقة جنابي بكلام زي
السم بسبب انقطاعي عنهم ... ما شاء الله ... فعلا هي دي أخت أمي ...

قعدنا في الصالون وبعدين دخل أبويا وعمي بعد الـ "يا ساتر" المشهورة .... وقعدنا كلنا
مودتي ....
[ندعوك للتسجيل في المنتدى أو التعريف بنفسك لمعاينة هذه الصورة]

توقيع : Professor

جزاك الله كل خير
وشكرا على الموضوع الرائع
دائما تبدع فى اختياراتك للمواضيع
نترقب جديدك

[ندعوك للتسجيل في المنتدى أو التعريف بنفسك لمعاينة هذه الصورة]

توقيع : مرسا

شكرآ للمرور

توقيع : Professor

سلمت الانامل الذهبيه

لما خطته لنا من عبارات

وحروف قمه في الجمال

وروعة الاحساس الصادق

دمتِ بود [ندعوك للتسجيل في المنتدى أو التعريف بنفسك لمعاينة هذه الصورة]

توقيع : ѕαα∂ ∂єѕιgη

» باحث أمريكى: تنظيم داعش بليبيا يوطد وجوده فى "سرت"
» يوميات عشق بغدادي ...الجزء السادس
» يوميات عشق بغدادي جـ4
» يوميات عشق بغدادي جـ5
» يوميات صرصور

يوميات باحث عن عروسة

يوميات باحث عن عروسة

يوميات باحث عن عروسة

يوميات باحث عن عروسة

يوميات باحث عن عروسة

مواضيع مماثلة

مواضيع مماثلة