(بعد الحب) حتعمل ايه بعد علاقتك بحبيبك تنتهى قول رأيك?

بسم الله الرحمن الرحيم
السلام عليكم
اولا بحب ارحب بيكوا واتمنى ان الموضوع يعجبكوا
بعد الحب :
كتير منا حب وفارق وكتير منا حب وربنا كرمه وكمل واتكلل حبه فى النهاية بالزواج عشان ربنا يكتب عليه السعادة اللى كان بيتمناها فى انه يرتبط بالشخص اللى قلبه اختاره لكن اللى انتهى حبهم بالفراق نعمل ايه بقى بعد الحب .
طبعا ده سؤال ناس كتير بتسألوا وناس كتير بتتعذب عشان مش لاقية حل او لاقيت حل ومش عارفين ينفذوا هى العملية مش صعبة وفى نفس الوقت مش سهلة بس كل حاجة لو اتعملت بجد وبإرادة ممكن تبقى سهلة بس الموضوع محتاج شوية صبر لأن انت مش حتعرف تعيش حياتك طبيعى تانى بين يوم وليلة .
اللى لازم يحصل بعد الحب سواء للولاد او للبنات لازم متلوموش نفسكوا ياجماعة اللى حصل حصل وربنا عايز كده ومفيش نصيب لحد كده فبلاش تلوم نفسك لو انت غلطان وتقول ياريتنى ماعملت كده وانتى برده بلاش تعذبى نفسك باحساسك بالذنب لأن اكيد ربنا مش كاتب ليكم خير مع بعض .
تانى حاجة حاول بقدر الإمكان تبعد عن اى حاجة تفكرك بيها او تفكرك بيه يعنى مثلا اغنية كنتوا متعودين تسمعوها اغنية بتفكرك بيها مكان كنتوا بتبقوا فيه مع بعض اى ذكرى برتبطكوا ببعض وكمان على اد ماتقدر متمشيش فى الشوارع اللى هى بتمشى فيها وحاول متعديش من قدام بيتها لو هى ساكنة قريب منك والكلام ده مش حيبقى على طول طبعا بس لازم فى الأول عشان اى حاجة فى اولها صعبة وانا مش حقول المفروض ان ده يستمر اد ايه لأن دى مسالة نسبية من شخص للتانى على حسب قوة ارادته وانه حيقدر ينسى بسرعة ولا لا .
ثالث حاجة اوعى تجيب سيرتها الا بكل خير يعنى لو حد سئلك مثلا لو كان حد عارف الموضوع او لو كنتوا مخطوبين اتكلم عنها بكل احترام وحب وقول انه مفيش نصيب لحد كده وانتى برده نفس الحكاية بلاش تكلموا وحش على بعض لأن انتوا فى يوم من الأيام كنتوا قلب واحد وشخصين عايشين بروح واحدة فزى ماحبتوا بعض باحترام لازم تسيبوا بعض باحترام وزى ماكنت بتتكلم عليها وانت بتحبها باحلى كلام برده لازم لما تسيبوا بعض تتكلموا على بعض باحلى كلام .
رابع حاجة حاول تبدا تعيش حياتك طبيعى زى الأول انا عارف ان ده بيبقى صعب لأنك اتعودت تكلمها وتحكيلها وكل يوم كان لازم تكلموا بعض وفجاة بتلاقى ان الكلام ده انتهى ومبقاش ينفع فلازم تحاول تعيش حياتك تانى وتفكر فى اللى جاى وفى مستقبلك وحاول متعميش قلبك وعنيك يمكن تلاقى الإنسانة اللى تعوضك عن اللى راح ويمكن انتى كمان تلاقى الشخص اللى ينسيك العذاب اللى شفتيه بعد الفراق .
وطبعا فى نقطة مهمة اوى لو انت ماشى فى الشارع وقابلتها وهى مثلا ماشية مع خطيبها بلاش تعذب نفسك وبلاش تبصها ببصات تعذبها بصلها بكل احترام ولو بنفع كمان سلم عليها وسلم عليه وانتى نفس الحكاية بلاش تحسسيه ان انتى بقيتى بتكرهى وخلوا الموضوع يعدى عادى جدا ولو بقى مش من حقك ان حتى تسلم عليها لما تشوفها وده اللى بيبقى فى معظم الحالات برده خلى الموضوع يعدى بكل سهولة وكان مفيش حاجة بينكوا من الأصل وصدقونى لو الواحد فضل كل لما يشوف حبه القديم يعذب نفسه ويبص لحبيبه بنظرات عتاب عمره ماحيعرف ينسى .

توقيع : MR.TITO