لقيط .. ولكن ما ذنبه ؟!

السلام عليكم ورحمة الله وبركاته

طفل اتولد نتيجة علاقة غير شرعية .. اترمى في أي مكان يمكن في الشارع

او اتحط في أي دار يكمل حياته فيه والواقع اللي هيصحى عليه

كبر شاف كل نظرات الاحتقار بتتوجه ليه .. حاول يعيش حياته لكن كل محاولة

أحيان كتيرة بتكون نتيجتها .. الفشل

كتير بيحلم انه ياريت كان ما اتولدش .. او اتولد بطريقة شرعية زي باقي الناس

لكن ما حدش بيختار حياته او العيشة اللي بيحلم بيها والظروف احيانا اقوى من

ان الانسان يسعى ويحاول يغيرها ..

الخطأ من البداية مش خطأه لكن دايما أخطاء الآباء يدفع ثمنها الأبناء

فعشان هو لقيط فلازم يتحمل أخطاء اللي أنجبوه !!

لما تكون لقيط صعب جدا انك تكسب محبة وموده انسان .. في المقابل

سهل جدا انك تكسب عداوة وحقد جميع الناس

فحاليا الجميع بيفسرو اسم اللقيط بمعني .. إنك غير مرغوب ما بيننا

غير ان مجتمعنا مجتمع يهتم جدااا بالنسب ويسأل دايما من أمك ومن أبوك ؟

وجدك الفلاني وجد جدك الفلاني اظاهر لحد ما نوصل للجد العاشر

حتى لما يكبر يخش الجامعه لو حد عرف أصله تلاقي الكل بيحاول يبعد عنه

ولو راح يقدم في وظيفة لو سأل اسم والدك او شغله ايه .. وهو بيكون مجهول النسب ولو عرف

انه لقيط او انه طالع من الدار يبقى الوظيفة كده راحت عليه

وطبعا اللقيط فرصته في الزواج او تكوين أسرة زي حلم أي انسان ضئيلة جدا

لانه لو جه يتقدم لواحده مش بعيد أبو البنت اللي رايح يتقدملها يطرده من البيت اول ما يعرف نسبه

مش ببالغ والله بس هي دي الحقيقة اللي بتحصل قدامنا ونشوفها

الحقيقة ان الانسان لو كان مجهول النسب في المجتمعات العربية يبقى ما لهوش مكان ما بينا

ولا ينفع يعيش معانا ..

حقه مهضوم وياريت لو كان هو الغلطان

ولكن ذنبه الوحيد انه شاف النور لكن بطريقة مختلفة غيرنا وعلى خطأ فادح

ارتكبه رجل وإمرأة مستهترين

الآباء يرتكبو أخطاء ولكن يدفع ثمنها الأبناء ؟ وليه اللقيط مالهوش الحق

انه يعيش في الدنيا ويفضل يتعاير بنسبه لحد ما أجله ينتهي

وليه احنا بنعامله بالطريقة دي ؟ وبننظر ليه نظرة احتقار

مفروض ما ننظرش ليه كنظره احتقار ولا شفقة .. لكن ننظر ليه كأي انسان عادي

لكن احنا جردناه من المشاعر والأحساسيس ونسينا في النهاية انه .. بشر

أسئلة كتير بتدور في ذهني وشغلت تفكيري كتير ولكن ليكم القلم

وليكم ينتقل حرية التعبير والنقاش عن الموضوع ..

خالص تحياتي

توقيع : MR.TITO