سياسة التعليم في مصر

السلام عليكم ورحمة الله وبركاته
أولا ده أول موضوع ليا في المنتدى وأتمنى انه يعجبكم

لفت انتباهي مقال منشور في صفحة الدكتورة "غادة عبدالعال" في الفيس بوك ، ونص المقال كالتالي :

(( من سلسلة مقالات سوسة المفروسة

تاريخ النشر بجريدة الشروق : الخميس 16 ابريل 2009
--------------------------------------------------------

اخشوشنوا
_________

إحنا كمصريين دايما مشهورين بتضخيم المواضيع.. مزاج عندنا التهويل وأسهل وأسرع حاجة بنعملها قدام أى موضوع بسيط إننا نعمل من الحبة قبة.. إيه بقى الكلام الكبير اللى بيتقال عن حالات الضرب فى المدارس ده؟..

الكل شايف إن دى حاجة سلبية ومشكلة لازم وزارة التعليم تتصرف بسرعة وتحلها.. اللى إنتوا ماتعرفهوش إن الموضوع ده لا هو جاى بالصدفة ولا هو حاجة عشوائية..ده نتاج لدراسة وتخطيط عكف عليهما أكبر خبراء التعليم فى مصرنا المحروسة..

الخبراء الأجلاء اكتشفوا إن الجيل ده كله طالع خرع ومايص..بدل الكورة الشراب بيلعبوا بلاى ستيشن وبدل الساحات الشعبية بيروحوا نادى الصيد والجزيرة وبدل برامج ماما نجوى وبابا ماجد بيتفرجوا على ماما هايفا وأبيه مهند..

العيال دى لو اتسابوا بالشكل ده هيضيعوا هيبة مصر قدام العالم.. ولا مصرى يقدر يرفع راسه بعد كده ويقول أنا ابن تحتمس أو رمسيس ولا حتى غمرة.. ولهذا كانت توصيات الخبراء اللى بتنفذها الوزارة حاليا بكل إخلاص وتفانى.. إيه يعنى لما ابنك يرجعلك بعد حصة العربى ناقص رجل؟.. طالما هيتعلم القوة والجلد.. وإيه اللى هيجرى يعنى لو مدرس التاريخ اتحمس شوية وطيرله دراع طالما بعدها هيعرف مصلحته؟..مافيهاش حاجة لو عين من عيونه اتصفت فى حصة الإنجليزى؟.. عين إيه وبتاع إيه ماهو عنده واحدة تانية..لكن يظل المبدأ:
To b or not to b that is the question.

كفايانا بقى تهويل للى بيحصل فى المدارس.. ماتبقوش شعب خيخة وأى كلام.. اخشوشنوا وخشنوا العيال.. من أجل مستقبل مشرق ملىء بالعاهات. أأ.. قصدى بالنجاحات لبلدنا الحبيب .....))

أنا بصراحه كده شايفه انها بالرغم من أسلوبها الساخر الا ان الموضوع فعلا حقيقي وتأثيره تعدى مرحلة السئ ... ويكفي اني أقول كان الله في عون الجيل الجديد
وده مش معناه اني قديمه والا حاجه ده كل الحكايه كام وعشرين سنة بس سياسة التعليم في مصر Shiny01